Litterarum tuarum, quas 25. mensis elapsi perferendas adme curasti, longe, quam continebant, aliud suspicabar argumentum. Nam vel Jovem lapidem jurassem, nuntiaturum te, Blanchini Demonstrationem historiae ecclesiasticae bonis tandem avibus Vindobonae advenisse, quorsum, quos pro ea pactus tibi Mellicii fueram, quosque in Scheda adjecta notatos vides, libros jam 5. Octobris in domum, ut volebas, nostram miseram inde a te auferendos. Jam verone verbo quidem pacti hujus nostri cum memineris, nescio profecto, e silentio isthoc tuo conjicere quid me oporteat. Quare quaeso te obtestorque, ut certior hac in re e litteris tuis quamprimum fiam. Nunc, quod primum quidem debui, epistolae tuae ut respondeam, alterum Claustroneoburgi Honoriani in Psalmos commentarii, cui tuum conferres, exemplum repertum a te fuisse, admodum laetor, opimaque, queis onustus ex Austria reversus domum es, litteraria Spolia ex animo tibi gratulor. Ad modum illum quod attinet, quo variantes cum e nostris tum e Neoburgensium codicibus Scripturas collecturas binas idemtidem apographi tui philuras Neumanno mihique mittere decrevisti ad fidem codicum quoque nostrorum castigandas, commodus ille sane fuerit; Sed nescio, id quod pace tua dixerim, an Sumtus, qui et mittendis et retro mittendis his philuris (rhedis quippe cursualibus publicis committendas existimem) jaciendi forent, ad calculos bene revocaveris.

Nam credam equidem, integrum Honorii commentarium trecentis in plagulis exscriptum iri; jam vero si pro unaquaque, quam mitteo, octo, quos cruciferos vocant, numos, totidemque pro ea, quam rursus accipis, solveris, octoginta florenorum, ni computatio vehementer me fallat, impensam facier, aequalem, immo ob litteras, quas semper cum variantibus scripturis apographotus addemus, majorem etiam fortassis et me et Neumanno facturis. Sed quaeso te Kollere Optime! noli haec eo a me dicta existimare, quo laborem, quem in eruendis e codicibus nostris discrepantibus a tuo locis subire me cupis, subterfugiam; nihil enim, crede mihi, est, quod tui caussa non lubentissime faciam [...]