Excellentissime, ac Reverendissime Domine Archi-Episcope Domine Benignissime

Cum vis gravissimi morbi, quo etiamnum afficior, ita non nihil remiserit, uti manum operi de statu Ecclesiae Pannonicae admovere potuerim; librum, qui jam editos sequitur, quartum hoc elapso autumno perfeci, ad etiam et Censura Regia his diebus recepi. Agit ille de antiquis Metropolitanio per Pannoniam. Quorum Ecclesiastica ditio cum per regiones, quas nunc Metropolis Colocensis Provincia complectitur, majoremu partem fusa extiterit; Tibi, Excellentisime Domine, qui huic Provinciae praesides, consecrandum, hunc librum Tuoque nominis inscribendum, viri docti ac sapientes existimaverunt Eorum in sententiam manibus pedibusque tanto alacrius ivi quanto certius intelligo, hanc fore mihi occasionem longe optimam, qua grati mei in Te animi publicam prodam testificationem. Tibi sane me debitorem vulgo norunt omnes, ut qui me nulla Tibi antehac necessitudine devinctum singulari laude ornaris, librosque meos ea dignatione prosecutus sis, ad quam ipse ne adspirare quidem andebam. Nondum id Tibi satis fuerat, nisi etiam scriptis ad me litteris benignitate plenissimis Tuam in me dignationem contestareris, meque incomparabili Tua beneficentia provocares, immo cogeres, uti, quacunque in re subsidium praesidiumque Tuum in studiorum meorum commodum futurum censuissem, ad illud confidentia libera confugerem. Utor concessa mihi libertate; Te proinde, Excellentissime Domine, etiam atque etiam oro: primum ut librum praesentem Tibi dicari patiaris, deinde sumptus ad ejus impressionem necessarios (qui circiter. ad 360. fl. assurgent) benigne largiaris Typographus noster homo est curtae. Supellectilis, tantaeque augustiae, ut laborem adgredi nequeat, nisi dimidium ei mercedis ante  praebeatur. Transponendae huc pecuniae modus fuerit opportunissimus, si illa consignetur Illustrissimo Episcopo Petheő ad nos brevi reversuro.

Nuper dissertatiunculam elucubravi de columna milliaria Romana ad Budam non pridem reperta, et ad aream Regiae Universitatis translata. Ejus exemplum recens editum eade causa Tibi mittere ausus sum, quod cum laudatam Universitatem modereris, pergratum Tibi Futurum omne id censui, quod ad illustranda illius monumenta quoquo modo conducat. De reliquo me Tibi totum devoveo, et sacratissimas manus Tuas profundisima submissione exosculans omni cum veneratione emorior.

Excellentiae Tuae

humillimus servus et Capellanus

Quinque-Ecclesiis die 1a Martii

1780.

Stephanus Szalágyi